ប្រែសម្រួល៖ រតនា

រីយ៉ាដ៖ អ្នកការទូតជាន់ខ្ពស់នៃសហរដ្ឋអាមេរិក និងរុស្ស៊ី នឹងជួបប្រជុំគ្នានៅអារ៉ាប៊ីសាអូឌីនៅថ្ងៃអង្គារ (ថ្ងៃទី១៨ ខែកុម្ភៈ) ដើម្បីពិភាក្សាអំពីការស្ដារទំនាក់ទំនងដែលបែកបាក់រវាងប្រទេសទាំងពីរ និងការចាប់ផ្តើមជំហានដំបូងក្នុងការបញ្ចប់សង្គ្រាមនៅអ៊ុយក្រែន។

ភាគីទាំងពីរបានបន្ថយការរំពឹងទុកថា កិច្ចប្រជុំកម្រិតខ្ពស់លើកដំបូងរវាងប្រទេសទាំងពីរ ចាប់តាំងពីប្រធានាធិបតីអាមេរិក ដូណាល់ ត្រាំ ឡើងកាន់តំណែង នឹងនាំមកនូវការរីកចម្រើនណាមួយ។

ទោះជាយ៉ាងណា ការពិតដែលកិច្ចចរចានេះកើតឡើង បានបង្កឱ្យមានការព្រួយបារម្ភនៅក្នុងប្រទេសអ៊ុយក្រែន និងអឺរ៉ុប បន្ទាប់ពីការបើកចំហថ្មីៗរបស់សហរដ្ឋអាមេរិកចំពោះក្រឹមឡាំង។

ប្រធានាធិបតីអ៊ុយក្រែន វ៉ូឡូឌីមីរ ហ្សេឡិនស្គី បានមានប្រសាសន៍ថា ក្រុងគីវមិនត្រូវបានអញ្ជើញឱ្យចូលរួមការពិភាក្សានៅរីយ៉ាដទេ ខណៈដែលមេដឹកនាំអឺរ៉ុបកំពុងជួបជុំគ្នានៅទីក្រុងប៉ារីសសម្រាប់កិច្ចប្រជុំបន្ទាន់ ដើម្បីឆ្លើយតបទៅនឹងការផ្លាស់ប្តូរជំហរយ៉ាងខ្លាំងដោយរដ្ឋបាលថ្មីរបស់សហរដ្ឋអាមេរិក។

ការត្រៀមរៀបចំសម្រាប់កិច្ចប្រជុំកំពូលដែលអាចកើតមានឡើងរវាងប្រធានាធិបតី ត្រាំ និង វ្លាឌីមៀរ ពូទីន ក៏ត្រូវបានរំពឹងថានឹងនៅក្នុងរបៀបវារៈផងដែរ។

លោក ត្រាំ កំពុងជំរុញឱ្យមានដំណោះស្រាយរហ័សចំពោះជម្លោះរយៈពេលបីឆ្នាំនៅអ៊ុយក្រែន ខណៈដែលរុស្ស៊ីមើលឃើញថា ការចូលមកជិតនេះជាឱកាសដើម្បីទទួលបានការសម្របសម្រួល។

លោក ហ្សេឡិនស្គី បានមានប្រសាសន៍ថា ក្រុងគីវ “មិនបានដឹងអ្វីទាំងអស់” អំពីការចរចានៅរីយ៉ាដ យោងតាមទីភ្នាក់ងារព័ត៌មានអ៊ុយក្រែន ហើយថា “មិនអាចទទួលស្គាល់កិច្ចព្រមព្រៀង ឬរឿងរ៉ាវណាមួយអំពីយើង ដោយគ្មានវត្តមានយើងនោះទេ”។

លោកបានថ្លែងនៅលើបណ្តាញសង្គមថា កិច្ចព្រមព្រៀងសន្តិភាពណាមួយនឹងត្រូវរួមបញ្ចូលការធានាសន្តិសុខ “រឹងមាំ និងអាចជឿទុកចិត្តបាន” ដែលបារាំង និងចក្រភពអង់គ្លេសបានអំពាវនាវ ប៉ុន្តែមិនមែនគ្រប់មហាអំណាចអឺរ៉ុបទាំងអស់គាំទ្រនោះទេ។

រុស្ស៊ីបាននិយាយមុនកិច្ចប្រជុំថា លោក ពូទីន និងលោក ត្រាំ ចង់ឈានចេញពី “ទំនាក់ទំនងមិនប្រក្រតី” ហើយថាខ្លួនមិនឃើញមានកន្លែងសម្រាប់ជនជាតិអឺរ៉ុបនៅតុចរចាណាមួយទេ។

រដ្ឋមន្ត្រីការបរទេសរុស្ស៊ី សេរ្ហ្គេ ឡាវរ៉ូវ និងទីប្រឹក្សាជាន់ខ្ពស់របស់លោក ពូទីន គឺលោក យូរី អូសាកូវ នឹងជួបជាមួយរដ្ឋមន្ត្រីការបរទេសអាមេរិក ម៉ាកូ រូប៊ីអូ ទីប្រឹក្សាសន្តិសុខជាតិ មៃក៍ វ៉ល និងអ្នកតំណាងពិសេសសម្រាប់មជ្ឈិមបូព៌ា ស្ទីវ វីតកូហ្វ។

• លទ្ធភាពនៃកិច្ចប្រជុំកំពូលរវាងលោក ត្រាំ និងលោក ពូទីន

អ្នកនាំពាក្យក្រឹមឡាំង ឌីមីទ្រី ពេសកូវ បានប្រាប់អ្នកកាសែតថា កិច្ចចរចានេះនឹង “ផ្តោតជាចម្បងលើការស្តារឡើងវិញនូវទំនាក់ទំនងរុស្ស៊ី-អាមេរិកទាំងមូល” រួមជាមួយនឹងការពិភាក្សាអំពី “ការចរចាដែលអាចកើតមានឡើងស្តីពីដំណោះស្រាយអ៊ុយក្រែន និងការរៀបចំការជួបប្រជុំរវាងប្រធានាធិបតីទាំងពីរ”។

ទីក្រុងមូស្គូ ដែលក្នុងរយៈពេលច្រើនឆ្នាំមកនេះបានព្យាយាមកាត់បន្ថយវត្តមានអង្គការណាតូនៅអឺរ៉ុប បានបញ្ជាក់ច្បាស់ថាខ្លួនចង់ធ្វើការចរចាទ្វេភាគីជាមួយសហរដ្ឋអាមេរិកលើបញ្ហាសន្តិសុខទូលំទូលាយជាច្រើន មិនមែនគ្រាន់តែការឈប់បាញ់គ្នាដែលអាចកើតមាននៅអ៊ុយក្រែននោះទេ។

មុនពេលវាយលុកនៅខែកុម្ភៈ ឆ្នាំ២០២២ លោក ពូទីន បានទាមទារឱ្យសម្ព័ន្ធមិត្តយោធាដកកងទ័ព គ្រឿងបរិក្ខារ និងមូលដ្ឋានទ័ពចេញពីប្រទេសសមាជិកភាគខាងកើតមួយចំនួន ដែលស្ថិតក្រោមឥទ្ធិពលរបស់មូស្គូក្នុងអំឡុងសង្គ្រាមត្រជាក់។

លទ្ធភាពនៃការចរចាណាមួយដែលនាំឱ្យមានកិច្ចព្រមព្រៀងបញ្ឈប់ការប្រយុទ្ធគ្នានៅអ៊ុយក្រែននៅមិនទាន់ច្បាស់លាស់នៅឡើយទេ។

ទាំងរុស្ស៊ី និងសហរដ្ឋអាមេរិក បានចាត់ទុកកិច្ចប្រជុំនេះថាជាការចាប់ផ្តើមនៃដំណើរការដែលអាចនឹងចំណាយពេលវេលាយូរ។

អ្នកនាំពាក្យក្រសួងការបរទេសសហរដ្ឋអាមេរិក ថេមី ប្រូស បានមានប្រសាសន៍ថា “ខ្ញុំមិនគិតថា ប្រជាជនគួរមើលឃើញរឿងនេះថាជាអ្វីមួយដែលទាក់ទងនឹងព័ត៌មានលម្អិត ឬការឈានទៅមុខក្នុងការចរចាបែបណាមួយនោះទេ”។

លោក អូសាកូវ បានប្រាប់ប្រព័ន្ធផ្សព្វផ្សាយរដ្ឋថា កិច្ចចរចានឹងពិភាក្សាអំពី “របៀបចាប់ផ្តើមការចរចាស្តីពីអ៊ុយក្រែន”។

ទាំងអ៊ុយក្រែន និងរុស្ស៊ី បានបដិសេធការសម្របសម្រួលទឹកដី ហើយលោក ពូទីន បានទាមទារកាលពីឆ្នាំមុនឱ្យក្រុងគីវដកកងទ័ពចេញពីទឹកដីកាន់តែច្រើន។

លោក ហ្សេឡិនស្គី នឹងធ្វើដំណើរទៅកាន់ប្រទេសតួកគីនៅថ្ងៃអង្គារ ដើម្បីពិភាក្សាអំពីជម្លោះជាមួយប្រធានាធិបតី រីសិប តៃយីប អឺដូហ្កាន និងបន្ទាប់មកទៅអារ៉ាប៊ីសាអូឌីនៅថ្ងៃបន្ទាប់។

អ្នកនាំពាក្យរបស់លោកបាននិយាយកាលពីថ្ងៃចន្ទថា លោកមិនមានគម្រោងធ្វើការចរចាជាមួយគណៈប្រតិភូសហរដ្ឋអាមេរិក ឬរុស្ស៊ីទេ។

លោក ហ្សេឡិនស្គី បាននិយាយកាលពីសប្តាហ៍មុនថា លោកត្រៀមខ្លួនរួចរាល់ក្នុងការជួបជាមួយលោក ពូទីន ប៉ុន្តែបន្ទាប់ពីក្រុងគីវ និងសម្ព័ន្ធមិត្តរបស់ខ្លួនមានជំហររួមមួយស្តីពីការបញ្ចប់សង្គ្រាមសិន។

• អារ៉ាប៊ីសាអូឌីត្រឡប់មកក្នុងរង្វង់មិត្តភាពវិញ

ខណៈដែលមេដឹកនាំអឺរ៉ុបជួបជុំគ្នានៅទីក្រុងប៉ារីសសម្រាប់កិច្ចប្រជុំបន្ទាន់ស្តីពីសន្តិសុខ លោក ឡាវរ៉ូវ បាននិយាយកាលពីថ្ងៃចន្ទថា លោកមិនឃើញមានហេតុផលអ្វីដែលពួកគេត្រូវចូលរួមក្នុងការចរចាអំពីអ៊ុយក្រែនណាមួយឡើយ។

សារៈសំខាន់នៃការចរចាដែលធ្វើឡើងនៅរីយ៉ាដមិនត្រូវបានមើលរំលងដោយអ្នកវិភាគឡើយ។

ដែលធ្លាប់ត្រូវបានគេមើលងាយក្នុងនាមជាប្រទេសដាច់ការទូតក្រោមរដ្ឋបាលអាមេរិកមុន ឥឡូវត្រូវបានទទួលយកមកក្នុងរង្វង់មិត្តភាពវិញ ជាមួយនឹងការវិលត្រឡប់មកវិញរបស់លោក ត្រាំ។

លោក ចេមស៍ ដរស៊ី នៃសាកលវិទ្យាល័យជាតិសិង្ហបុរី បាននិយាយថា “អឺរ៉ុបគឺជាកន្លែងប្រជុំតាមប្រពៃណីសម្រាប់ជនជាតិអាមេរិក និងរុស្ស៊ី ប៉ុន្តែនោះមិនមែនជាជម្រើសក្នុងបរិយាកាសបច្ចុប្បន្នទេ”។

លោកបានបន្ថែមថា “អ្នកត្រូវតែទៅអាស៊ី ឬទៅអារ៉ាប៊ីសាអូឌីត”។

មូស្គូចូលរួមក្នុងការចរចាដោយមានទឹកចិត្តរីករាយដោយសារជោគជ័យថ្មីៗនៅសមរភូមិ ខណៈដែលក្រុងគីវក៏ប្រឈមនឹងការបាត់បង់ជំនួយយោធាសំខាន់ៗពីសហរដ្ឋអាមេរិក ដែលត្រូវបានរិះគន់ជាយូរមកហើយដោយលោក ត្រាំ៕

ប្រភព៖ AFP/lh